پنجابی صوفیانہ کلام ۔ سیف الملوک ۔معراج شریف دا ذکر ۔ میاں محمد بخش
معراج شریف دا ذکر
| سجناں تے خُوش مُشکاں ڈُہلیاں، دُشمن سرسُہاگے | آئی رات مُبارک والی، بھاگ اساڈے جاگے |
| سِکدیاں یاراں نُوں آ پُہتے ،سِکّاں دے پروانے | اسماناں پر تارے رؤشن، شمع چراغ یگانے |
| آملِیے ہِک جوڑ مُحمّدﷺ، تینُوں قُرب نہ تھوڑا | وحی وکیل لیایا سدّا ،نالے گھوڑا جوڑا |
| سد گھلیوں وڈیائی دے کے ،عزّت ودھّی سجن دِی | ہر دم سِک تُساڈی سانُوں ،آئی رات مِلن دی |
| کُرسی عرش مُعلیٰ ویکھیں ،سیر کریں سبھ جائیں | لوح قلم اسماناں زمیاں ،دوزخ جنت تائیں |
| نالے رُوح نبیاں سندے ،ہون سلامی سارے | عزّت قُرب تُساڈا ویکھن ،حُوراں ملک پیارے |
| پاک جمال تُساڈے کارن، ہر دی جان ترسدی | دوزخ جنّت وِچ اسماناں ،جو خلقُ اللہ وسدی |
| شرف سعادت پاون سارے ،شُکر بجا لیاون | ویکھ جمال حبیب صلى الله عليه وسلم میرے دا ،صدقے صدقے جاون |
| چائی واگ مُحبّت والی ،ٹُریا راہ طلب دا | ہویا سوار بُراقے اُتّے ،اوہ سلُطان عرب دا صلى الله عليه وسلم |
| خِدمت اندر حاضر ہوئے ،بدھّے لک ولیاّں | لے لے نذراں ملدے اگّوں، رُوح تمام نبیاں |
| اج جنجاں دا لاڑا آیا ،مل مل رکھو گلیاں | سے سنگار کیتے سبھ حُوراں ،منگل گاون کھلیاں |
| طٰہٰ تے یٰسین پھُلّاں دا ،سہرا شرم تے پاکی | اَسریٰ دا سرگشت سرے تے، افسر سی لولا کی |
| سُرمہ سی مازَاغَ اکھّیں وِچ ،گل تعویذ قُرآنوں | سوہنی جھنڈ مُعنبر سر تے، چمکے نُور دُخانوں |
| صلی اللہ علیہ وسلم ،کرن نقیب پکُاراں | نعت درُود صلوٰۃ سلاموں ،چھٹیاں جھُولن قطاراں |
| جتھّے وحی نہیں ونج سکدا ،ہٹ بیٹھا کر ڈیرے | چھوڑ اسماناں زِمیاں تائیں، سرور صلى الله عليه وسلم گیا اگیرے |
| چل اگیرے نال اساڈے، کیوں بیٹھوں کر ڈیرا | سرور نے فرمایا اُس نُوں ،جے تُوں ساتھی میرا |
| جے ہِک گِٹھ اگیرے ہوواں، سڑ جاندے پر سارے | کیتی عرض فرشتے حضرت ،کؤن اسیں بے چارے |
| ایسا قُرب تُسانُوں لائق، جاؤ ہِک ہکلّے | نئیں مجال اساڈی اگّے، چمکن نُور تجلّے |
| اہل کمال جلال محُمدّ صلى الله عليه وسلم ،تُوں ہی تُو ہیں سُجھدا | جتّھے قدم تُساڈا اوتھے ،ہور نئیں کوئی پُجدا |
| قَابَ قؤسین اَو ادنیٰ تائیں، پایا شان حضُوری | سبھ کسے تھیں گئے اگیرے ،چاء چاء پردے نُوری |
| خلعت تُحفے ہدیے لے کے، آئے پھیر مقّررہ | جانی نال ملے دِل جانی ،وِتھ نہ رِہیاّ ذرّہ |
| عیب گُناہ خطایاں بابت، کیوں دوزخ ول ٹُرسی | ایسا نبی جنہاں دا والی ،سو اُمّت کیوں جھُرسی |
| لاکھ صلوٰۃ سلام تیرے تے، لاکھ درُود ہزارا | کے کُجھ نعت تُساڈی آکھاں، خلقت دے سردارا |
| پیرواں اصحاباں اُتّے، بھی بنُیاد تیری تے | تُدھ پر ہون درُود اللہ دے ،آل اؤلاد تیری تے |
| حق جنہاں دے ثَانِیَ اثنَینِ، اِذ ھُمَا فِی الغَارِ | پیر مُرید صدیق اکبر سن، پہلے یار پیارے |
| ایہہ شیطان رجیم رُلایا، پنجے اندر پھڑکے | یار دُوجا فارُوق عمُر سی ،عدل کیتا جس چھڑکے |
| عثُمان ذُوالنورین پیارا ،مہتر یُوسف ثانی | شب بیدار غنی سی ترِیجا، جامع جو قرآنی |
| دُلدُل دا اسوار علی ہے ،حیدر شیر حقانی | چوتھا یار پیارا بھائی ،خاصہ دِل دا جانی |
| سخی بہادر جگ وِچ نادر ،جِس دا عالی پایہ | لَحمُکَ لَحمِی دَمُّکَ دَمّیِ، شان جِنہاندے آیا |
| جُمل جہان ہوئی رُشنائی شاہ ،مرداں دے نُوروں | ذُوالفِقار جنہاں نُوں اُتری ،خلعت فقر حضُوروں |
| خیبر کوٹ کفار گِڑائیوس ،ڈنکے دین وجائے | جمدّڑیاں سن جس دے اگے، بُتّاں سیس نوائے |
| دوئے امام دِتے راہ مولیٰ، پھیر صبر کر ٹِکیا | ستّر دو بہتر واریں ،راہ اللہ دے وِکیا |
| پاک شہید پیارے تیرے ،افسر آل نبی دے | رباّ اِنہاں اِماماں پِچھّے، جو گُل لال نبی دے |
| خنجر جھاگ مُحبّت والی، ہِکناں بدن حلالے | ہِکناں عِشق تیرے دے پیتے، بھر بھر زہر پیالے |
| پانی باجھ پیاسے چلّے ،دِین دُنی دے سائیں | ہوندی قُوّت زور نہ لایا، بیٹھے من رضائیں |
| سر ِدِتّے پر سِی نہ کِیتی، شادی کر کر چلدے | عِشق تیرے وِچ گھائل ہوئے، مائل حُسن ازل دے |
| میں عاجز مسکِین بندے نُوں، نال اِیمانے ماریں | پِیر سَنے وِچ نِیر عِشق دے، بیڑا میرا تاریں |
| میں بھی دوہیں جہانی پھڑیا, دامن آل رسُولے | توڑے رد سوال کریسیں ,توڑے عرض قبُولے |
| ذرِّے جِتنا گھٹدا ناہیں، ہتّھوں ہوندا عالی | یا نبی اللہ جے کُجھ دِتّا ، قدر تینُوں ربّ والی |
| رحمت اتے لقاء مہر دا، پاک جنابوں پائیے | اؤگنہار طُفیل تُساڈے ،اسیں بہشتیں جائیے |
| مینُوں ہکّو نام تُساڈا ،گہنا روز حشر دا | ہور کسے کُجھ نیکی ہوسی، توشہ خرچ قبر دا |
| ہوندے زور سوال نہ موڑیں، نبی کریم کہاویں | تینُوں قوّت بخشی مؤلیٰ ،سبھ خلقت بخشاویں |
| کد کریماں دے در اُتّوں ،مُڑ آوے ہتھ خالی | دوست دُشمن چنگا مندا جے ،کوئی ہوئے سوالی |
| اؤ گنہار کُوچجیں بھریا ،بخشیں نبی کریما | رکھّی جھول تُساڈے اگّے، پاؤ خیر یتیماں |
| نام اللہ دے بخش بے ادبی، نہ کر پکڑ گُناہوں | کیتی بے فرمانی تیری ،بُھلاّ پھریوس راہوں |
| طٰہٰ تے یٰسین الٰہی ،صفت تُساڈی کردا | سُخن نہیں کوئی ہوندا میں تھیں، تیری شان قدر دا |
| آل اصحاب سمیت سلاماں، ہور درُود پچُاواں | بُہت عزّت لؤلاکی تینُوں، کے میں صِفت سنُاواں |
| پاؤ خیر مُحمّد تائیں ،صدقہ شاہ جیلانی | آل اؤلاد تیری دا منگتا، میں کنگال زیانی |
Discover more from احمدیت حقیقی اسلام
Subscribe to get the latest posts sent to your email.
